ప్లాస్టిక్‌ నోట్లకు ఆర్‌బీఐ గ్రీన్‌ సిగ్నల్‌?

రూ.10, రూ.20 నోట్లపై ప్రయోగాత్మకంగా ఫీల్డ్‌ ట్రయల్స్‌

ముంబై: దేశంలో ప్లాస్టిక్‌ కరెన్సీ నోట్లను ప్రవేశపెట్టే దిశగా రిజర్వ్‌ బ్యాంక్‌ ఆఫ్‌ ఇండియా కీలక అడుగు వేసినట్లు సమాచారం. తొలిదశలో రూ.10, రూ.20 విలువ కలిగిన ప్లాస్టిక్‌ నోట్లపై ప్రయోగాత్మకంగా ఫీల్డ్‌ ట్రయల్స్‌ నిర్వహించేందుకు ప్రక్రియ ప్రారంభించనున్నట్లు తెలుస్తోంది.

ప్లాస్టిక్‌ నోట్ల తయారీకి అవసరమైన ప్రత్యేక ముడి పదార్థాన్ని సరఫరా చేసేందుకు అర్హత కలిగిన సంస్థల నుంచి ప్రతిపాదనలను ఆహ్వానించే ప్రక్రియను ఆర్‌బీఐ అనుబంధ సంస్థ భారతీయ రిజర్వ్‌ బ్యాంక్‌ నోట్‌ ముద్రణ్‌ ప్రైవేట్‌ లిమిటెడ్‌ చేపట్టినట్లు సమాచారం.

ప్రస్తుతం చలామణిలో ఉన్న కాగితపు నోట్లతో పోలిస్తే ప్లాస్టిక్‌ నోట్లు ఎక్కువ కాలం మన్నికగా ఉండే అవకాశం ఉందని భావిస్తున్నారు. ముఖ్యంగా తరచుగా చేతులు మారే రూ.10, రూ.20 వంటి చిన్న విలువ నోట్లు త్వరగా చిరిగిపోవడం, పాడవడం వంటి సమస్యలను తగ్గించేందుకు ప్లాస్టిక్‌ నోట్లు ఉపయోగపడే అవకాశం ఉందని నిపుణులు అంచనా వేస్తున్నారు.

ప్లాస్టిక్‌ నోట్ల వినియోగంపై భారత్‌లో గతంలోనూ ప్రయోగాత్మకంగా ప్రయత్నాలు జరిగాయి. 2012లోనూ ప్లాస్టిక్‌ నోట్లను ప్రవేశపెట్టే అంశాన్ని పరిశీలించినప్పటికీ, అప్పట్లో ఎదురైన సాంకేతిక సమస్యల కారణంగా ఆ ప్రక్రియ ముందుకు సాగలేదు.

ప్రస్తుతం అందుబాటులోకి వచ్చిన ఆధునిక సాంకేతిక పరిజ్ఞానం, నోట్ల తయారీలో వచ్చిన మార్పుల నేపథ్యంలో ప్లాస్టిక్‌ కరెన్సీపై మరోసారి ప్రయోగాత్మకంగా పరిశీలన జరుపుతున్నట్లు సమాచారం. అయితే దేశవ్యాప్తంగా ప్లాస్టిక్‌ నోట్లు చలామణిలోకి వస్తాయా లేదా అన్నది ఫీల్డ్‌ ట్రయల్స్‌ ఫలితాలు, తదుపరి నిర్ణయాలపై ఆధారపడి ఉంటుంది.