ఓటు బ్యాంకు రాజకీయాలపై ఆధారపడలేదు.. వ్యక్తిగత ఆశయం కోసం కాదు: మోదీ

న్యూఢిల్లీ: ఓటు బ్యాంకు రాజకీయాలపై తాను ఆధారపడలేదని ప్రధాని నరేంద్ర మోదీ అన్నారు. రాజకీయాల్లో వెలగాలనే ఉద్దేశం తనకు లేదని, భవిష్యత్తు గురించి కూడా ఆలోచించకుండా ఒక లక్ష్యం కోసం పనిచేయాలని భావించానని పేర్కొన్నారు.

వ్యక్తిగత ఆశయం కోసం కాకుండా ఒక నిర్దిష్ట లక్ష్యంతో పనిచేయాలనే ఉద్దేశంతో రాజకీయాల్లోకి వచ్చానని మోదీ తెలిపారు. ప్రజా జీవితంలో వ్యక్తిగత ప్రయోజనాల కంటే దేశ ప్రయోజనాలకు ప్రాధాన్యం ఇవ్వాలన్నదే తన ఆలోచన అని ఆయన పేర్కొన్నారు.

గత ప్రభుత్వ పాలనపై మోదీ విమర్శలు చేశారు. ఆ కాలంలో విధానపరమైన నిర్ణయాలు తీసుకోవడంలో జాప్యం నెలకొన్నదని, ‘పాలసీ ప్యారలసిస్‌’కు గత ప్రభుత్వం మరోపేరుగా మారిందని వ్యాఖ్యానించారు.

ఓటు బ్యాంకు రాజకీయాలకు దూరంగా ఉంటూ విధానపరమైన నిర్ణయాలు, అభివృద్ధి లక్ష్యాలతో ముందుకు సాగాలని తాను భావించినట్లు మోదీ తెలిపారు.