ఢిల్లీలో హైటెన్షన్‌.. !

న్యూఢిల్లీ: కేంద్ర ఎన్నికల సంఘం కార్యాలయం వరకు ఇండియా కూటమి ఎంపీలు ర్యాలీ చేపట్టడంతో ఢిల్లీలో ఉద్రిక్త పరిస్థితులు నెలకొన్నాయి. పార్లమెంట్‌ నుంచి ఈసీ కార్యాలయం వరకు ఎంపీలు ర్యాలీగా బయలుదేరారు. ప్రధాన ఎన్నికల కమిషనర్‌ జ్ఞానేశ్‌ కుమార్‌ను పదవి నుంచి తప్పించాలని వారు డిమాండ్‌ చేస్తున్నట్లు సమాచారం.

విపక్ష ఎంపీల ర్యాలీ నేపథ్యంలో ఢిల్లీ పోలీసులు అప్రమత్తమయ్యారు. పార్లమెంట్‌ నుంచి కేంద్ర ఎన్నికల సంఘం కార్యాలయం వరకు భారీగా పోలీసు బలగాలను మోహరించారు. ర్యాలీ మార్గంలో పలు ప్రాంతాల్లో బారికేడ్లు ఏర్పాటు చేశారు.

ఇండియా కూటమి ఎంపీల ర్యాలీ కారణంగా సెంట్రల్‌ ఢిల్లీలోని పలు రహదారులను మూసివేసినట్లు సమాచారం. దీంతో ఆయా మార్గాల్లో రాకపోకలకు అంతరాయం ఏర్పడింది.

ర్యాలీ నేపథ్యంలో కొన్ని ప్రాంతాల్లో ఇంటర్నెట్‌ సేవలు నిలిచిపోయాయని, మొబైల్‌ డేటా పనిచేయడం లేదని సమాచారం. అయితే ఇంటర్నెట్‌ సేవల నిలిపివేతకు సంబంధించి అధికారికంగా కారణాలు, పరిధి వెల్లడికావాల్సి ఉంది.

ఈసీ కార్యాలయం వద్దకు ఎంపీలు చేరుకునే అవకాశం ఉండటంతో పోలీసులు భారీ భద్రతా ఏర్పాట్లు చేశారు. పరిస్థితిని అదుపులో ఉంచేందుకు పోలీసు అధికారులు నిరంతరం పరిస్థితిని పర్యవేక్షిస్తున్నారు.