రామప్పకు సమీపంలో ఓపెన్‌కాస్ట్‌ బొగ్గు గని..!

వరంగల్‌: రామప్ప దేవాలయానికి సమీపంలో ఓపెన్‌కాస్ట్‌ బొగ్గు గని ఏర్పాటు చేయాలన్న ప్రతిపాదనపై బీఆర్‌ఎస్‌ తీవ్ర అభ్యంతరం వ్యక్తం చేసింది. ప్రపంచ వారసత్వ సంపదగా గుర్తింపు పొందిన రామప్ప దేవాలయానికి, రామప్ప చెరువుకు గనుల తవ్వకాల వల్ల ముప్పు వాటిల్లే అవకాశం ఉందని ఆ పార్టీ ఆందోళన వ్యక్తం చేసింది.

రామప్ప దేవాలయానికి అతి సమీపంలో బొగ్గు గని ఏర్పాటు చేయడానికి కాంగ్రెస్‌ ప్రభుత్వం సిద్ధమవుతోందని బీఆర్‌ఎస్‌ ఆరోపించింది. భూగర్భంలో తవ్వకాలు, బ్లాస్టింగ్‌ల కారణంగా దేవాలయ నిర్మాణం, పరిసర ప్రాంతాలపై ప్రభావం పడే అవకాశం ఉందని పేర్కొంది. తెలంగాణ శిల్పకళకు ప్రతిరూపంగా నిలిచిన రామప్ప ఆలయాన్ని, దాని పరిసర వారసత్వ ప్రాంతాన్ని పరిరక్షించాల్సిన బాధ్యత ప్రభుత్వంపై ఉందని తెలిపింది.

భూముల విషయంలోనే కాకుండా భూముల లోపల ఉన్న సహజ వనరుల వినియోగం పేరుతో వారసత్వ కట్టడాలకు ముప్పు కలిగించే నిర్ణయాలు తీసుకోవడం సరికాదని బీఆర్‌ఎస్‌ విమర్శించింది. వారసత్వ సంపదను దెబ్బతీసే ఏ చర్యనైనా తమ పార్టీ వ్యతిరేకిస్తుందని స్పష్టం చేసింది.

రామప్ప దేవాలయానికి హాని కలిగించే అవకాశం ఉన్న ఓపెన్‌కాస్ట్‌ బొగ్గు గని ప్రతిపాదనను ప్రభుత్వం వెంటనే వెనక్కి తీసుకోవాలని బీఆర్‌ఎస్‌ డిమాండ్‌ చేసింది. ప్రతిపాదనను ఉపసంహరించుకోకపోతే పెద్ద ఎత్తున ఉద్యమం చేపడతామని హెచ్చరించింది.