AP: 28 కొత్త జడ్పీల ఏర్పాటుకు ఏపీ సర్కార్ గ్రీన్ సిగ్నల్!

అమరావతి: పరిపాలనా సౌలభ్యాన్ని పెంచేందుకు ఏపీ కూటమి ప్రభుత్వం కీలక నిర్ణయం తీసుకుంది. ప్రస్తుతం ఉన్న 13 జిల్లా పరిషత్‌ల (ZPలు) స్థానంలో 28 కొత్త జిల్లా పరిషత్‌లను ఏర్పాటు చేస్తూ ప్రభుత్వం ఉత్తర్వులు జారీ చేసింది. కొత్తగా ఏర్పడిన మార్కాపురం మరియు పోలవరం జిల్లాలకు కూడా జిల్లా పరిషత్‌లను మంజూరు చేశారు.

30 కొత్త పోస్టులు...

కొత్త జిల్లా పరిషత్‌ల నిర్వహణ కోసం 15 అదనపు సీఈఓ (CEO) పోస్టులు మరియు 15 డిప్యూటీ సీఈఓ పోస్టులను సృష్టించనున్నారు. పనిభారం మరియు అవసరాల ఆధారంగా ప్రస్తుతం ఉన్న సిబ్బందిని కొత్త జిల్లా పరిషత్‌లకు కేటాయించాలని ప్రభుత్వం నిర్ణయించింది.

ప్రస్తుత జిల్లా పరిషత్ పాలకవర్గాల పదవీకాలం ఈ నెల 24తో ముగియనుంది; ఆ తర్వాత 28 జిల్లా పరిషత్‌ల వ్యవస్థ అమలులోకి వస్తుంది. రాష్ట్రంలోని 660 మండలాలను కొత్త జిల్లా పరిషత్‌ల పరిధిలోకి వచ్చేలా మ్యాపింగ్ చేయాలని అధికారులను ఆదేశించారు.